Giovanni Cavazzon
IL
DIARI -Stampe libare
Diretôr responsabil: MAURO
TOSONI
Realizât cul jutori de Regjon Friûl Vignesie Julie
IL DIARI, MENSÎL DI INFORMAZION - NUMAR 11, NOVEMBAR DAL 2007 - EDITÔR: T&T COMUNICAZIONS, UDIN - STAMPE: EDIGRAF, VIE DAI MONTECCHI, TRIEST - REGJISTRAZION TRIBUNÂL DI UDIN N.42/06 - PUESTIS TALIANIS S.P.A - SPEDIZION IN A.P. - 70% - CNS UD N.16/06
Lis
manifestazions de Academie Liciniana di Martignà pai 40 agns di
ativitât artistiche dal mestri Giovanni Cavazzon
Il
Friûl in 150 ritrats
L’autoritrat di Cavazzon e, a drete, il ritrat dal famôs artist furlan Giorgio Celiberti
Al è
za stât marcât cemût, cui pardabon cetancj (passe 150) ritrats
di personis e personaçs di ogni etât e stât sociâl, Giovanni
Cavazzon al vedi di fat realizât un cuadri de societât furlane,
che si pues ben ricognossi tal timp, tai estris, tai dolôrs dal
taramot, te celebrazion dai siei interpretis plui significatîfs.
Tra chescj il plui resint al è l’Omaç
a Primo Carnera (Museu
Vile Carnera di Secuals), une pirografie su len di pôl (cm
240x110) che e celebre lis carateristichis e e sintetize la vite
di chest mît. Altris personaçs dal sport tant che Enzo
Bearzot e
Dino
Zoff a
son i protagoniscj di dôs oparis particolârs.
Il ritrat di
Giorgio Celiberti al è descrit intun test critic di Licio
Damiani: “La ecletiche rapinositât di tecnichis e je confermade
des imagjins multiplis mutuadis dal dinamisim cinematografic, là
che Cavazzon, par rivâ a brincâ la molteplicitât di espressions
dal sogjet che a dan sù intun marilamp, al doplee o al tripliche
lis musis te stesse composizion. Ve, alore, la secuence dai Trê
moments di Giorgio Celiberti,
intaiâts cun lapis e sanghine cun dissen rampit di fate
leonardesche (…)”
Domenico De Stefano al scrîf: “La
femine si lasse ritratâ ancje tai siei aspiets plui intims, e je
simbul de vite e dal amôr che e puarte tal grim, e Cavazzon al
ricercje te sô cjalade i revocs plui platâts, dolçs e sensuâi
tal stes moment. Il so al è un lavôr di introspezion e di
indagjin psicologjiche: ve il ritrat
di Paola Borboni,
in chê volte e veve novante agns, cussì disponibile a metisi in
pose cul so estri inmò galandin; ve la splendide Dalila
Di Lazzaro ritratade
te sô bielece, vivarositât e elegance; ve Alessandra
Guerra figurade
sedi tai siei moments serens e te sô feminilitât che tant che
“vitime” des preocupazions e des responsabilitâts che i
vegnin de sô cjarie tal mont politic (dut câs ca no je condane,
ma ben partecipazion); ve inmò Gianola
Nonino,
piturade intune espression enigmatiche.
I ritrats feminins a
son completâts cun figuris di vecjis feminis furlanis pituradis
te lôr dignitât salde, juste dopo di vê patît i martueris dal
taramot.”
Ancje il teritori furlan al è stât studiât cui
“ritrats” des puartis di Vie Vilalte prime de ristruturazion.
Il corpus di chestis oparis al è un document storic di un moment
de vite de citât di Udin.
Lis lûs e lis muris di Palme a àn
ispirât cetancj cuadris, cussì come i paisaçs rampits de lagune
di Grau.
Giulio Belluz al à scrit che “I ritrats di
Cavazzon a son un diferent di chel altri. No parcè che lis musis
a son difeerentis: al sarès facil. A son diferents parcè che la
ricercje psicologjiche e sociâl di ogni personaç e da vite a une
storie uniche. Individuâl. E individuabile te tecniche, tal
supuart, tai colôrs. Tant che chescj ritrats no son dome
“ritrats” ma ben “cuadris”, parcè che a van di là de
scjaipule de rapresentazion dal sogjet.”
Compagn si pues dî
sul studi dai paisaçs e dai lûcs.
Dutis furlanis a son lis
modelis che a àn ispirât il maestôs cicli des oparis (cuadris e
instalazions) Intor
di Venus.
Tal
coment di Licio Damiani si lei di “Un zûc sutîl di fentis, di
ribatudis, di rimants ironics. Romanticisim, purece formâl
estreme e voie di zûc, la citazion perfete fin tal virtuosisim e
la parodie de memorie. Tes splendidis Veneris
di
Giovanni Cavazzon la art e cjale se stesse, si esibìs e si ribat
inviant un procès sofisticât di speculazion mentâl.”
Enzo
Santese al scrîf che “La piture di Giovanni Cavazzon e je peade
ben e no mâl cuntune origjin di classicitât, che e salte fûr
intune figurazion là che la femine di vuê e chê dal mît si
soreponin intune alusivitât plene di revocs significants.
L’artist al marcje l’ôr concetuâl de bielece contestualizant
la figure feminîl intune sclete rarefazion.”
La tiere dal
Friûl e je ancje tiere di vin: il cicli des Bacantis
al è
cetant preseât in mostris a teme e ancje tes cantinis, tant che
in chê dai Produtôrs di Cormons, là che a son presintis grandis
oparis realizadis su pes botis. Domenico De Stefano al scrîf che:
“L’aspiet di origjinalitât di Cavazzon di chest pont di viste
si pues notâ in prin plan te splendide opare Bacantis,
cun ritmis classics, là che lis trê figuris a son invuluçadis
intune lûs artificiâl e inmagade tes tonalitâts preziosis dai
ros, narant e rosâts, e imbastide intun senari ireâl di sfantâsi
cu la lôr bielece svoladie.”
IL
PROGRAM
Chest an a son cuarante agns di presince salde e di
ativitât culturâl dal mestri Giovanni Cavazzon in Friûl. Di
formazion inteletuâl lombardeemiliane (si è diplomât Mestri di
Art in senotecniche li de Academie “Toschi” di Parme e al à
frecuentât la Academie di Brera cun docents tant che A. Funi), al
è vignût a stâ in Friûl tal 1967, sul inizi de sô ativitât
di insegnant di educazion artistiche. In Dicembar si fasarà une
fieste in ocasion dai 40 agns in Friûl dal mestri Giovanni
Cavazzon li de sede de Academie Liciniana. In chê ocasion e sarà
presentade la monografie edite de Cjase Editore di Art GHELFI di
Verone, cun test critic dal dot. Licio Damiani, e une antologjie
di diviers autôrs. Personâl li de sede de Associazion (dal 1 ai
23 di Dicembar dal 2007). Conciert dai diplomants e dai diplomâts
dal Conservatori “J. Tomadini”.
