Giovanni Cavazzon
IL
DIARI -Stampe libare
Diretôr responsabil: MAURO
TOSONI
Realizât cul jutori de Regjon Friûl Vignesie Julie
IL DIARI, MENSÎL DI INFORMAZION - NOVEMBAR DAL 2015
Dome cun ingjustri e penin
Te Biblioteche Nazionâl di Firenze lis oparis di Giovanni Cavazzon
Si
scree a Florence, par cure de Associazion Culturâl Liciniana di
Martignà, une mostre di grant atrat là che il mestri Giovanni
Cavazzon al propon lis sôs oparis fatis cu la tecniche dal
ingjustri su cjarte doprant il penin. La rassegne e je ospitade de
Biblioteche Nazionâl Centrâl di Florence e e svante un
testimonial fûr dal comun, Gianfranco Aquila, president di une
des plui innomenadis fabrichis di stilografichis taliani, la Elmo
e Montegrappa Spa di Bassano del Grappa. Il mestri Cavazzon nus
mostre cetant che chescj mieçs, antîcs tant che la scriture, a
sedin ancjemò vîfs. Come che al dîs Aquila: “Une part
fondamentâl de stilografiche al è il penin, ogjet vîf, sensibil
al fatôr uman tant che la lenghete di un imprest a flât. Fluit
tant che il respîr, l'ingjustri al lasse une olme precise dal
nestri jessi. Cul penin si pues ancje disegnâ e Giovanni Cavazzon
nus pant cemût che il so fâ creatîf e la sô umanitât si
strucjin - cence nissun filtri – inte pagjine blancje: a cheste
umanitât lui al zonte une maestrie dal segn rare e fine”.
Dilunc
vie la manifestazion al sarà presentât ancje il volum monografic
su la mostre: in plui dal coment de diretore de Biblioteche
nazionâl Maria Letizia Sebastiani, al ten dentri la testemoneance
di Gianfranco Aquila, de curadore Anna Pascolo e dal autôr. “Par
tant timp, al conte, o ai lavorât cul lapis fin a cuistândi ogni
peculiaritât; cuant che o ai vût une paronance energjiche tal
segn, o soi passât a doprâ il penin che al è une vore plui
complicât. L'ingjustri nol permet di scancelâ e al oblee a une
imediatece di segn plen de sveltece de esecuzion a dut vantaç de
comunicazion drete tra pensîr e realizazion”. La manifestazion
e previôt ancje des visitis vuidadis inmaneadis de Biblioteche
nazionâl dulà che i arlêfs des scuelis a podaran lâ daûr di
un percors didatic viodin i libris dedicâts al scrivi. Sabide ai
24 di Otubar, po, aes 11, e sarà une conference inmaneade dal
Club Unesco de Toscane, là che il mestri Cavazzon al fevelarà
dai “Personaçs di Tiziano a Picasso lets di un ritratist di
vuê”.